Urdu Health Articles

Urdu Health Articles, Home Treatments, Benefits of Fruits And Vegetables, Homoeopathic Treatments And Tips in Roman Urdu

Nabz Shanasi Khahni

Nabz Shanasi: Here you will read about Nabz Shanasi In Roman Urdu

Table of Content
  • Nabz Shanasi In Roman Urdu
  • Nabz Shanasi Story In Urdu

    Nabz Shanasi In Roman Urdu

    Bohat dino ki baat hai ek wasi malik ka badshah gair mamoli salayaton ka malik tha. Wo bara elm dost tha, alamon ki izzat afzai aur madad main koi kotahi nahi karta tha. Wo apni riyaya ka bhi bara humdard or gumsar tha. Khud kai kai roz shehron aur gaon me aam admi ki tarah phirta rahta tha aur apne wizra aur deger amaid saltanat ko bhi bhejta rahta tha. Yun wo awam ki taqleefon aur praishaniyon se bakhabar rahta tha aur unke sad baab ki tadbeeren karta rahta, is liye awam-o-khawaas sab mutmaeen rahte thai. Wali ahed abhi chota tha. Is ki taleemo tarbeeat bhi isi andaz main ki jarahi thi ke wo garibon, nadaaron, ka humdard aur bahi khuwa aur inhe insaan hi samjhe.

    Chand barson baad jab wali ahed athara bars ka howa to ek sehet mund sajeela jawan tha, jo tamam marwaja deeni aur dunyawi uloom se bahra mund tha. Ek din us ne badsha se kaha ke wo bhi riaya ki khaber geeri aur apne elaaqe ko dekhne ke liye badsha ki tarah bhes badal ker jana chahta hai.badsha ko wali ahed ki khuwaish per bara pyar aya,mager pedri shafqat ke sabab ijazat dene se hich kicha raha tha.shahzade ki zid ne isko majboor kardia ke ijazat dede aur kaise na deta jo kaam khud karta tha, us se bete ko kaise rokta aur ye ke deen aur dunya dono ki khidmat bhi thi. Bla akhir is ne ijazat dedi, magar ye kaha ke dekho ziyada door na jana, ziyada din mat lagana or chund asherfiyan apni zaroorat se ziyada rakh lena aur hosake to mujhe bakhabar rakhna aur khamoshi se ek ghulam bhi saath kardia ke saamne na aana, magar saath sath rahna.

    Shahzada aam libaas me rawana huwa aur doosre hi din us ne ghulam ko pahchaan lia aur daant ker is se kaha ke abhi wapis chala ja warna me apna safar khatam kardounga .

    Ghulam ne bohut iltija ki  ke me aap ke kisi kaam me harij nahi honga, apko kisi kaam se nahi rokoun ga, aap ke raaste me nahi aaonga aur aap se dour rahoun ga, magar shahzada razi na huwa ghulam majboorun wapis hogaya.

    Shahzada tunha safar karta raha, logon se milta raha. Unke dukh dard sunta raha. Jahan jahan mumkin huwa un ki madad karta raha. Halaat tahreer karta raha. Wo safar me aisa magan huwa ke kuch ziyada hi waqt lag gaya, ab ye mobile phone ka zamana to tha nahi ke pal pal ki khabar deta rahta. Idhar badsha aur malka fikar mund rahne lage, magar phr huwa ye ek din shahzada wapis agaya, thaka huwa, paser murda. Badshah fikarmund to huwa, magar safar ki thakun samjh ker kuch ziyada tashweesh ka izhaar na kia, magar waqt ke saath saath shahzade ki paser murdgi me izafa hota dekh ker badshah aur malka dono ki tashweesh me izafa hogaya. Badshah se ziyada malka beqarar hoti thi, baar baar aker bete se baat karna chahti thi, wo bhi kuch kahna chahta tha, magar hont kapkapa ke rah jaate the aur kuch kah na pata tha.  Malka janna chahti thi ke ager wo beemar he to elaaj kia jaye, is ko kuch chahiye to farahum ker dia jaye, unhon ne bohut koshish ki magar shahzade ka mizaaj kisi tor bahaal nahi horaha tha, wo roz baroz tanhai pasand hota jaraha tha, ehbaab baar baar aker is ko ser shikaar ke bahane lejana chahte the raks o surood ki mahfilon se litf andoz hone ke liye raagib karne ki koshish karte the magar shahzade ke liye in tamam mashagil se be etanae me izafa hi hota raha. Ye soorat e haal bohut paraishan kun thi, malka aur badsha dono ki tashweesh roz baroz barhti jarahi thi aur koi tadbeer samjh main na atti thi.

    Badshah ne apne darbaar ke daanish mandon or waziron se mashwara kia, sab ka khayal yehi tha ke ye koi marz he, jis ka ilaaj hona chahiye. Phr har kisam ke elaaj karne walon se rujoo kia gaya, wo aate, shahade ka muaina karte, kuch baaten karne ki koshish kerte, jis ke jawab me shahzada aksar khamosh hi rahta, phir wo elaaj tajweez karte the, qeemte dawae taiyaar kerte. Wo aksar istemaal bhi karleta tha, magar preshani ye thi ke us ki kefiyat me koi bahtari nahi arahi thiaur mazeed yeke us ki giza roz baroz kam hoti jarahi thi. Elaaj muaalje se koi afaqa na huwa to jhard phook karne walo se rujoo kia gaya, magar ye koshish bhi raiga hi gae, ab badsha ke mizaaj me chidchirahat barh gae. Akhir us ne elaan kardia ke jo koi shahzade ko sahet mund ker dega, sona chandi me tol dia jaye ga, basurat uski gardun maar dijaye gi. Phr elaaj kerne ke daawe daaron ki taadaadme kami hoti gae magar, kuch taleh aazma aate rahe or badshah ki barhmai ka shikar hote rahe, unhe qatal to nahi kia gaya, magar jail me zaroor daal dia gaya. Badshah ki chidchirahat kuch or bhi barhti ja rahi thi, kiyoun ke shahade ke baare me afwaahen phailne lagi thi, koi jin ka saya kahta, koi kisi taweez ka asar btata, badshah kahta: “ye sab shaube baaz hain, kisi ko kuch nahi aata, mareezon ko beqawoof bnaker darhum o deenar lootte hain, sehet or shafa allah taalah hi ata karte hain, un ki dawa ka koi asar nahi hota.’’

    Ek din malka ki ek munh chari kaneez ne malka ke saamne dabi zaban se ek tabeeb ka naam lia, malka ne kuch tawajjo na ki. Wo bhi bohut preshaan balke mayoos horahi thi. Chand din baad kaneez ne phr kaha: malka aalia! In tabeeb se bhi rujoo kerne me kia harj he, ula lia jaye kuch na karsake to jahan itne qaid hain, ek or qaid hojaye ga. Malka ne darte darte badshah se tazkira kia. Badshah to jese hawas me khota jarah tha. Us ne cheekh ker kaha: bulao oose bhi qatal karwa dounga.

    Kaneez ne hakeem saheb ka pata bataya. Malka ne ardali doraye. Hakeem saheb bare tazak o ahteshaam se tashreef laye, jab unhe badshah ki sharait batai gai to usne kisi qadar be niyazi se kaha:“sona chandi badshah ko mubarak ho, raha qatal kara dene ka muaamla to mout zindagi allah ke haath hai, magar me elaaj karoun ga ya nahi ye mareez ko dekh ker bataoun ga”.

    Hakeem saheb ko shahzade ke pass pohcha dia gaya, hakeem saheb ne gor se dekha, aankhe khol ker un ka rung dekha, zubaan dekhi, nabz dekha phr kaha:elaaj shurou karta houn, shafa dena allah ka kaam he. Badshah ne gusse se kaha: phr tum kia karo ge. Hakeem saheb ne matanat se kaha: tadbeer karoun ga aur duwa karoun ga. Aap kisi aise fard ko bulaye, jo aap ke elaqe ke tamam shahron, qasbon, gaaon se waqif hon. Badsha ne phr madakhlat ki, waqeel saheb ne nihayat pur sukoon hoker kaha: elaaj me kar raha houn, wasael muhaiya karna aap ki zimadari he, ager aap nahi kar sakte to me chalta houn.badshah ne khafeef hoker wazeer ki taraf dekha, wazeer ne ek aise tajir ko hazir kardia jo apna saman shaher shaher aur gaaon gaaon phir farokht karta tha.

    Hakeem saheb ne shahzade ki nabz pakar li aur tajir se kaha: theher theher ker tamam shahron, qasbon aur gaaon ka naam lete raho. Wo ek ek shaher ka naam leta raha, achanak hakeem saheb ne rukne ka ishara kia aur naam dhohrane ko kaha, phr wahin rok ker badshah se kaha:kisi aise shaks ko bulaye, jo is qasbe ki tamam sarko, shahrahon aur galiyon se waqif ho. Badshah ki jhinjhilahat barh rahi thi, magar phr bhi is elaqe ke ek shaks ko hazir kar dia gaya. Hakeem saheb ne kaha:tamam shahrahon, sarkon aur jagahon ke naam lete jao, jahan rukne ko kahoun ruk jana.hakeem saheb nabz pakre rahe, wo shaks naam leta gaya, ek jaga hakeem saheb ne ruk ker duhraane ko kaha. Phr hakeem saheb ne badshah se kaha ke kisi aise shaks ko bulaye, jo is gali  me rahne wale tamam logon se waqif ho, ab badshah ki is munfarid tareeqa elaaj se kuch kuch dil chaspi hone lagi thi. Chunacha wo shaks bhi paish kardia, hakeem saheb ne kaha ke us gali me rahne wale tamam logon ke naam lena shurou kardo, boohre jawan, mard, aurat, ladke ladkiyan, bache sab ke naam lo koi rah na jaye, is shaks ne naam lene shurou kiye, hakeem saheb nabz per tawajja markooz kiye rahe, ek ladki ke naam per hakeem saheb ne us shaks ko rok dia aur kaha:ye naam phr se lo. Isne ladki ka naam dohraya. Hakeem saheb ne nabz chord di. Badshah ko alug bula ker kaha ke elaaj hogaya, dawa daryaft hogae he, shahzade us ladki ke ishq me mubtil hain. Aap ki mohabbat aur khauf ki waja se kah nahi sake aur sab kuch apni jaan per jhelte rahe, is ladki se un ki shadi kar dijiye, aisa hi kia gaya, shahzade ko sahet hoi aur hakeem saheb ko badsha ne wapis nahi jaane dia or apni khusoosi musheer bna lia.

    Jo waqaya ooper tahreer kia gaya he, wo koi tasawar raati kahani nahi he, balke sultan noh in mansoor ke bhateeje ke elaaj ka waqaya he aur hakeem saheb e tib ke wo naam o farzand the, jinho ne pahli martaba nafsiyaat ko tareeqa elaaj me shamil kia. Ye wo hussain ibne abdullah seena the, jin ki kitaab al qanoon fil tib ke baare me doctor waleem ausler ne kaha tha: äl qanoon kisi bhi doosri kitaab ke muqable me ziyada arse tak tib ki baibal ke tor per zinda rahi. Ye wohi ibne seen athe ke jan batour musheer unhon ne bohut goro fikar ke baad ek sarkular jari kia tha ke koi fauji afsar tax wasool nahi kre ga, ye fauj ka kaam nahi he. To is circular per fauji bohut khafa howe, un ke mahal per qabza ker lia aur sultan per dabao dala ke unhe phaansi dedi jaye.sultan bohut dabao me the phaansi to nahi di, magar phr bhi jail me daalna pada aur sarkular wapis lena pada. Kitaab al kanoon fil tib usi doraan likhi gae. Un ko ek katib farahum kardia gaya. Wo roz pachaas safhaat imla karate the.al kanoon me nabz shanasi per teen so ek safaat shamil hain. Ye wohi ibne seena the, jinhon ne sultan bin mansoor samani ke elaaj ka muaafza zro jawahir ke bajaye sirf us ke kutub khane se istafada ki ijazat maangi thi.

     

    Tips In Udu's Articles
    Eat Clarified Butter - Benefits Of Butter Tips
    Importance Of Sleep - Healthy Life Tips
    Eating Carrot - And Be Healthy Tips
    Anger And Fighting - Healthy Tips
    Dieting
    How To Stand Properly
    Some Tips To Remember Before Makeup
    Treatment From Honey Bee - Shehad Ki Makhi Se Ilaj
    How To Cook Rice
    Nabz Shanasi Khahni

    Copyright 2016 www.urduhealth.com...............
    Template by w3layouts