Urdu Health Articles

Urdu Health Articles, Home Treatments, Benefits of Fruits And Vegetables, Homoeopathic Treatments And Tips in Roman Urdu

To Challenge Negative Thinking

To Challenge Negative Thinking: Here you will read about To Challenge Negative Thinking (Manfi Soch Ko Chanllenge Karna) in Roman Urdu. 

Table of Content
  • To Challenge Negative Thinking in Roman Urdu
  • Manfi Soch Ko Chanllenge Karna In Urdu
  • To Challenge Negative Thinking In Urdu

    To Challenge Negative Thinking in Roman Urdu

    Rebt ki abjud main d say muraad parakhna, par’taal karna aur phir challenge karnay ka marhala hai. Sabsay pehlay apkay samne a yaani mehrik waqiya ata hai jo apkay pareshaan kun jazbaat paida karta hai ya jazbaati rad’de amal c ko janam deta hai, dusray marhalay main a ke baray main apnay maqool (rb) ya ghair maqool (ib) khayalaat daryaaft kartay hain. Teesray marhalay par ap waze’h tor par tasleem kartay hain ke apkay ib, ghair maqool khayalaat hi apkay pareshaan kun jazbaat ya ghair sehat mandana jazbaati amal takhleeq karnay ka zariya hain. Chou’thi (4th) marhalay par ap apni puri shid’dat say aur takraar ke sath apnay ib (ghair maqool soch) ko challenge kartay hain.

    Kishore p’haadke aik mahir-e-nafsiyaat hain aur mumbai main rebt ki practice ke sath sath iski taleem bhi detay hain. Wo d ke marhalay ko teen (3) hissoun main taqseem kartay hain.

    1.    Suraagh lagana

    2.    Imtiyaaz karna

    3.    Behas karna (ya challenge karna)

    Yeh taqseem puri tarah durust aur mufeed hai. Kiun ke d kea mal main bunyaadi ghair maqool khayalaat ka suraagh lagaya jata hai. Unhain waze’h tor par maqool khayalaat say alag kiya jata hai aur phir un ghair maqool khayalaat ko fa’aal tareeqay say zair-e-behas laya jata hai. Ab tak humnay apkay samnay ghussay ki abjud ka kha’ka paish kiya aur yeh bataya hai ke kis tarah ap apnay ghair maqool khayalaat ko shanaakht karsaktay hain jo ghussa paida kartay hain. Ab hum apko dikhayengay kea p kis tarah shid’dat aur tasalsul ya takraar say apnay ghair maqool khayalaay ko maqool khayalaat say alag karsaktay hain aur phir un ghair maqool khayalaat ko challenge karsaktay hain.

    Zair-e-behas lanay ya challenge karnay kea mal ka aghaaz karnay ke liye aik bar phir un ghair ghair maqool khayalaat ki chaar bari iqsaam ko paish-e-nazar rakhiye jo us waqt apkay zehan main ubhartay hain jab apko logoun par ghussa ata hai. Ap dekhengay ke un main say har aik ke sath sath maqool khayal bhi paya jata hai. Ap ghair maqool khayalaat ko apnay un maqool khayalaat say alag karsaktay hain jo kisi ki taraf say barham kiye janay ke mou’qay par sehat mandana manfi jazbaat ke sath ghussay ke baghair ubhartay hain.

    1.maqool khayaal:

    Mujhay tumhari bad’zabani achi nahi lagi. Meray khayaal main behtar yeh hoga ke tum khud yeh silsila khatam kardo.

    Ghair maqool khayaal:

    Tumhain yeh bak bak bilkul nahi karni chahiyay. Balkay tumhain meray sath ye bura rawaiy’ya qat’an ikhtiyaar nahi karna chaiyay.

    2.maqool khayaal:

    Tum gandi zabaan ke sath meray sath paish arahay ho, tumhara rawaiy’ya intehaayi bura hai, behtar yehi hai ke tum apna rawaiy’ya durust karo.

    Ghair maqool khayaal:

    Tum gandi zabaan ke sath jis tarah paish arahay ho, tumhain qat’an aisa nahi karna chaiyay. Tum aik behooda shakhs ho jiski muzam’mat hona chahiyay aur sakht saza milni chaiyay.

    3. Maqool khayaal:

    Kitni na’khush gawaar bat hai ke tum meray liye itni gandi zabaan istemaal kar rahay ho. Mera khayaal hai tum apna yeh andaaz chordo aur khud bhi is bhadday pan ko mehsoos karo.

    Ghair maqool khayaal:

    Kitni khofnaak aur dehshat angaiz baat hai ke tum meray sath itni gandi zabaan istemaal kar rahay ho. Halaa’n ke tumhain qat’an aisa nahi karna chahiyay. Is say ziada wahiyaat rawaiy’ya aur kiya hosakta hai?

    4. Maqool khayaal:

    Mujhay yeh baat intehaayi ajeeb mehsoos horahi hai ke tum meray liye gandi zabaan istemaal kar rahay ho. Ab main chaunga ke tumsay jahan tak mumkin ho duur rahun.

    Ghair maqool khayaal:

    Meray liye yeh sab kuch intehaayi na-pasandeeda hai ke tum is tarah meray liye gandi zabaan istemaal kar rahay ho. Tumhain qat’an aisa nahi karna chaiyay. Meray liye yeh na’qaabil-e-bardaasht hai. Mujhay zabardast ghussa araha hai. Ab main isay mazeed bardaasht nahi karunga.

    Mazkora’h baala har bayaan ka aghaaz aik maqool khayaal ke sath hota hai al’batta aakhir main aik ghair maqool hokum diya jata hai halaa’n ke dono tarah ke bayaan main taqaza sirf yeh hai ke gandi zabaan istemaal na ki jaye chuna’chay pehlay dono tarah ke khayalaat main mojoud farq ko dekhiye. Phir apnay maqool khayal pe kaar’band rahiyay aur sakhti ke sath ghair maqool khayaalat ko challenge kijiye. Ap is ke liye darj zail tareeqa istemaal karsaktay hain.

    Manfi Soch Ko Chanllenge Karna In Urdu

    Appartment main sharaakat ki misaal ko istemaal kartay huay ap jack aur june keg hair munsifana aur na’shaaista tarz-e-amal ke baray main apni ghair maqool soch ka izhaar kartay huay khud se keh saktay hain. Kitni khofnaak bat hai ke unhoun ne mujhay itni zehmat main dala aur phir mua’hiday se munharif hogaye.

    Ab hum farz karletay hain kea p apni ghair maqool soch say agaah hogaye hain aura b usay challenge karna chahtay hain. Aisi soorat main ap sab say pehlay khud say puchengay.

     

    “kisi maqool waja ke baghair un logon ne mua’hiday say inheraaf kiya lekin us iqdaam ko khofnaak kesay kaha jasakta hai? Ya phir mukhtasir lafzoun main…….”

    “uski bad’maal’amgi ko kiya cheez khofnaak bana rahi hai?”

    Yaqeenan ap keh saktay hain ke jack aur june ke tarz-e-amal ne apko ghair zaruri zehmat aur ikhrajaat say dou’chaar kiya. Bilkul durust hai. Lekin agar ap is soorat-e-haal ko mehez ranjeeda’h samah lain aur nuqsaan de’h samajh lain to phir shaded ghussay ka nahi sirf mayoosi aur ta’assuf ka ehsaas paida hoga. Apnay dekha ke is soorat-e-haal main apkay ghair sehat mandana jazbaat yaani ghussa paida karnay wali soch jack aur june ke tarz-e-amal ko apki taraf say khofnaak qaraar dena tha.

    Apki taraf say jack aur june ke tarz-e-amal ko ghair musifaana aur bura qaraar dena bilkul durust hai kiun ke apkay aur unkay darmiyaan aik mua’hida tha jis par amal dar’amad karnay main wo log nakaam rahay chuna’chay apkay maqaasid aur mufadaat ko nuqsaan puhancha. Lekin apki taraf say unkay tarz-e-amal ko khofnaak aur dehshat angaiz qaraar dena is baat ki nishaan dahi karta hai kea p un logon ke baray main kuch aur khayalaat bhi rakhtay hain. Mas’lan:

    1.    Jack aur june meray sath itna bura sulook kar rahay hain jitna bura sulook koi aur meray kar sakta hai. Meray sath unkay sulook say bura maamla aur kia hosakta hai.

    2.    Yeh log waqi’atan meray sath sou feesad (100%) bura sulook kar rahay hain aur main yeh soorat-e-haal qat’an bardaasht nahi kar sakta.

    3.    Unhain hargiz hargiz meray sath yeh bura sulook nahi karna chahiyay tha.

    4.    Meray dost honay ke natay meray sath itna bura sulook karnay ke bajaye sirf aur sirf acha sulook karna chaiyay tha kiun ke doston ke sath log khaas tor par acha sulook kartay hain.

    Ap in juta’zabzib khayalaat ko parakhnay ke liye khud say mandarja zail sawalaat kar saktay hain. Unkay sath munasib jawab bhi mojoud hain.

    •    kia jack aur june ne meray sath itna bura sulook kia hai jitna koi aur kar sakta tha? Jo kuch unhon ne kiya, kiya us say ziada bura maamla kuch aur hosakta hai?

    Ans: nahi, unhon ne jo kuch kia buhat bura tha lekin us say bhi buri soorat paish asakti thi. Mas’lan wo mujhay qatal bhi kar saktay thay ya phir meray sath naye apartment main mutaqil to hojatay par musalsal masaayil paida kartay rehtay.

    •    kia unhon ne meray sath sou feesad (100%) bura sulook kia? Kiya main yeh soorat-e-haal bardaasht nahi kar sakta.

    Ans: nahi, bura sulook to kiya lekin 100% bura nahi. Aur chahay unhon ne kitna hi bura sulook kiya hai. Agar main unkay na munasib rawaiy’ye ke liye khud ko pareshaan karna chor dun to ab bhi soorat-e-haal ko bardaasht karsakta hun. Haan, agar wo acha sulook kartay to ziada mutma’in rehta.

    •    kiya aisi koi waja hai ke unhain behr soorat meray sath aisa bura sulook nahi karna chaiyay tha jaisa unhon ne kiya.

    Ans: yaqeenan nahi, buhat si aisi wajuhaat aur asbaab hosaktay hain jinhoun ne unhain meray sath itna bura sulook karnay par majboor kiya. Lekin unhon ne na-pasandeeda’h andaaz ikhtiyaar kiya. Jo kuch unhon ne kiya wo unki fitrat ka hissa hai. Jab wo buraayi par utartay hain to phir unhain bura tarz-e-amal hi ikhtiyaar karna hota hai. Jo kuch unkay liye zaruri tha unhon ne kiya aur behoodgi ke sath kiya.

    •    kiya yeh durust hai ke meray dost honay ke natay unhain meray sath qat’an bura sulook nahi karna chaiyay tha? Doston ko to khaas tor par aisa nahi karna chaiyay.

    Ans: nahi yeh bhi khaam khayaali hai. Dost bhi meray sath itna bura sulook karsaktay hain jitna koi aur. Aur ba’az auqaat aisa hi hota hai. Zaahir hai yeh dost bhi itna achay dost saabit nahi huay. To theek hai yeh log dost nahi ban saktay to na banain. Ayenda main is tarah ke maamlaat aisay logon ke sath ta’y kiya karunga jo meray dost nahi hain.

    Agar ap apnay sath logon ke rawaiy’ye ke baray main “zaroori aur laazmi” ki tawaq’quaat aur mutalbaat ko musalsal puri quwwat say challenge kartay rahain aur is soch ko parakhtay rahain ke log meray sath ghair munsifaana aur na-meharbaan sulook kartay hain to tab bhi ap numayaan manfi khayalaat rakhtay hain. Is liye ke rebt ki yeh koshish nahi hoti ke apko is andaaz main “maqooliyat pasand” banaye kea p har tarah ke jazbaat-o-khayalaat say kinara kush hojayen. Bilkul nahi balkay yeh is baat ki hosla afzaa’yi karta hai ke jab ghalat baat horahi ho, maamlaat kharabi say dou’chaar horahay hon to kuch manfi khayalaat ubharnay dain, mas’lan malaal, ta’assuf, mayoosi, pareshaani, narazgi aur jhalaahat waghaira. Is liye kea p insaan hain machine nahi aur sirf machine’oun ke jazbaat nahi hotay wo mechanic’ee andaaz main kaam karti chali jati hain. Al’batta insaanoun ko apnay maqool aur ghair maqool jazbaat ki shanaakht aur unkay mutabiq af’aal ki pehchaan honi chahiyay. Aur phir mazkora’h halaat-o-jazbaat manfi to hain lekin sehat mand manfi khayalaat kiun ke apko dar’paish zar’rasaa’n soorat-e-haal ka muqabla karnay aur mumkina tor par ghalib anay main madad detay hain aur agar zaroori ho to waqar ke sath haqaa’iq ko qubool karnay aur unkay sath rehnay main madad detay hain. Mas’lan narazgi, malaal, ta’assuf aur pareshaani waghaira ke khayalaat to apko soorat-e-haal qubool karnay par amada’h kardetay hain lekin ghussa tay’sh aur ishte’aal aisa nahi karnay detay. Is liye yeh koshish kabhi na kijiye ke apnay har tarah ke khayalaat ko hata dain ya jhatak dain.

    Al’batta yeh zaroor kijiye ke apnay ghair sehat mandana manfi jazbaat mas’lan ghez-o-ghazab, bad’hawaasi, depression aur khud’tarhami ko sehat mandana manfi khayalaat say mumaiz kijiye aur sirf aisay khayalaat ko challenge kijiye jin main “ ---- laz’man hona chaiyay tha. Aisa nahi kiya jana chahiyay tha. Yeh buhat khofnaak baat hai. Yeh na-qaabil-e-bardaasht hai ----” jaisay mutalbaat aur kaifiyaat mojoud hon.  Is tarah ki batain ghair sehat mandana manfi khayalaat main paayi jati hain. Jab aik dafa ap is tarah ke khayalaat ko challenge karna aur tabdeel karna seekh jatay hain to phir puri zindagi is mahaarat say mustafeed hotay rehtay hain.

    Anger's Articles
    Suppress Anger
    Way Of Calm Down In Anger
    Different Steps Anger Changes In Attitude
    Anger Changes In Attitude
    Control Your Anger
    Anger Lesson Of Moral
    Anger Increases In Temperament
    Deterioration In Troubles
    Moral Act Of Anger
    More Ways Of Controling Anger

    Recent Articles

    Hemorrhoids

    Cushing Syndrome

    Health Information

    ..........

    Copyright 2016 www.urduhealth.com...............
    Template by w3layouts